У расійскім Санкт-Пецярбургу аўтобус з пасажырамі трапіў у ДТЗ на мосце і зваліўся ў раку Мойку, ёсць пацярпелыя, паведамляе тэлеграм-канал SHOT. Мінімум трое загінулі.
Інцыдэнт адбыўся на Пацалуевым мосце ў Санкт-Пецярбургу. Аўтобус з пасажырамі трапіў у ДТЗ з аўтамабілем каршэрынгу, вылецеў з моста і зваліўся ў раку Мойку. У аператыўных службах паведамілі, што кіроўца аўтобуса не справіўся з кіраваннем. У салоне было 20 пасажыраў.
Момант падзення аўтобуса з моста таксама трапіў на відэа — мяркуючы з усяго, у аварыю трапіла адна з мадэляў расійскага машынабудаўнічага холдынгу Volgabus.
На месца прыбылі экстранныя службы, ім дапамагалі відавочцы і медыкі. Ратавальнікі рабілі масаж сэрца пацярпелым проста на даху патанулага аўтобуса.
Спачатку ў аператыўных службах паведамілі пра гібель аднаго чалавека, пасля колькасць загінулых павялічылася да трох. Шасцёра шпіталізаваныя.
Як перадае SHOT, на 14.28 паводле мясцовага і беларускага часу ратавальнікі дасталі ўсіх пасажыраў з патанулага аўтобуса, у салоне нікога не засталося. Выратаваныя восем чалавек, яшчэ каля дзесяці пасажыраў выбраліся самастойна. Ратавальная аперацыя доўжылася каля гадзіны.
Паводле звестак SHOT, затрыманы кіроўца каршэрынгу, пасля сутыкнення з якім аўтобус зваліўся ў Мойку. Кіроўца аўтобуса таксама затрыманы, заведзеная справа за парушэнне ПДР, што пацягнула смерць чалавека, паведамляе РІА «Новости».