Шматдзетны амерыканец Раян Боргварт, які летам інсцэніяваў сваю смерць падчас сплаву на байдарцы і знік, выйшаў на сувязь з паліцыяй і расказаў, як зладзіў свае ўцёкі. Следства лічыць, што мужчына знаходзіцца ва Усходняй Еўропе, а атрымаць весткі ад яго ўдалося дзякуючы нейкай рускамоўнай жанчыне, паведамляе BBC.
Праз некалькі месяцаў спробаў праваахоўнікаў знайсці зніклага Раяна Боргварта ён звязаўся з імі сам. Мужчына 11 лістапада даслаў следчым штата Вісконсін відэазапіс, у якім заявіў, што ён жывы і ў бяспецы.
«Добры вечар, гэта Раян Боргварт. Сёння 11 лістапада. Паводле вашага часу цяпер прыкладна дзесяць раніцы. Я ў сваёй кватэры. Я ў бяспецы, усё ў парадку. Спадзяюся, гэта спрацуе», — паведаміў амерыканец у роліку.
Ён не ўдакладніў, дзе канкрэтна знаходзіцца, але следства лічыць, што ва Усходняй Еўропе. Звязаць Боргварта з уладамі яго краіны дапамагла нейкая рускамоўная жанчына — амерыканская паліцыя падтрымлівала з ёй кантакт з пачатку лістапада.
«Добрая навіна, што ён жывы і здаровы. Кепская навіна — мы не ведаем, дзе менавіта знаходзіцца Раян, і ён не збіраецца вяртацца дадому», — пракаментаваў шэрыф акругі Грын-Лэйк Марк Подал.
Боргварт таксама расказаў паліцыі, як арганізаваў свае ўцёкі. Паводле яго, спачатку ён утапіў сваю байдарку і тэлефон у возеры, потым на маленькай дзіцячай лодачцы даплыў да берага, дзе загадзя схаваў электраровар. Ён усю ноч ехаў да буйнога горада Мадысана, потым сеў на аўтобус у Дэтройт, адтуль трапіў у Канаду і, нарэшце, вылецеў з суседняй краіны ў невядомым кірунку.
Паліцыя паведаміла, што працягвае правяраць гэтую інфармацыю.
Хутчэй за ўсё, Боргварт дзейнічаў адзін. Кінуўшы жонку і траіх дзяцей, ён не выходзіў з імі на сувязь з моманту знікнення. За некалькі дзён да ўцёкаў амерыканец аформіў страхавы поліс на 375 000 даляраў, перавёў грошы на замежны рахунак, сфатаграфаваў нядаўна атрыманы пашпарт і змяніў адрас электроннай пошты. Таксама ён вёў перапіску ў інтэрнэце з жанчынай з Узбекістана.
На пытанне пра магчымыя матывы ўчынку мужчыны шэрыф Марк Подал дапусціў, што «ў яго былі асабістыя праблемы і ён думаў, што так будзе лепш».
Цяпер паліцыя спрабуе пераканаць Боргварта вярнуцца дадому, «маніпулюючы яго пачуццямі». Так, шэрыф упірае на тое, што дзеці мужчыны могуць застацца без бацькі на Каляды і яго вяртанне было б для іх «найлепшым падарункам».