Аляксандр Лукашэнка 17 лістапада заслухаў даклад пра перспектывы развіцця ПВТ. Ён папрасіў расказаць, як мусіць працаваць Парк высокіх тэхналогій, якая сітуацыя там складваецца. А сам падзяліўся сваёй крыўдай — ён нават не мог сабе ўявіць, што айцішнікі выступяць супраць яго ў 2020 годзе.
«Скажам шчыра, успамінаючы 2020 год, той мяцеж, які быў навязаны нашаму народу… супрацоўнікі Парку высокіх тэхналогій праявілі сябе, мякка кажучы, не з найлепшага боку. І, вядома, у грамадстве ў большасці сваёй прысутнічае нейкая насцярожанасць у гэтым плане. Вось гэта я маю на ўвазе, што надышоў час зняць нейкія непатрэбныя нам нюансы з функцыянаваннем ПВТ», — заявіў Лукашэнка.
Віну за гэта ён усклаў не толькі на супрацоўнікаў Парку высокіх тэхналогій, але і на кіраўніцтва іх кампаній.
«Гэта часткова наш недагляд. Ну, а хутчэй за ўсё, гэта непазбежны этап, які мы перажывалі, калі Парк высокіх тэхналогій і тыя кампаніі, якія там былі зарэгістраваныя, яны былі, скажам наўпрост, даччынымі кампаніямі. Гаспадары былі далёка за межамі Беларусі. Мы бачылі і атрымлівалі звесткі напярэдадні гэтага бунту, што будуць задзейнічаныя супрацоўнікі ПВТ як рухальная сіла. І зноў жа, прызнаюся, што ні я, ні спецслужбы не надалі гэтаму належнай увагі. Мы проста адмахнуліся ад гэтага. Я думаў, ну не можа ж быць, каб твае дзеці пачалі супраць цябе вайну. За гэта і паплаціліся. Аказваецца, што і такія дзеці могуць ваяваць супраць бацькоў, калі ім добра плацяць. То-бок нашы людзі (гэта таксама трэба адкрыта прызнаць), якія працуюць у Парку высокіх тэхналогій, атрымліваючы прыстойныя даходы ў параўнанні з сярэдняй зарплатай у Беларусі, аддалі перавагу вялікім грашам і выконвалі каманды сваіх замежных гаспадароў, часцей за ўсё заакіянскіх», — сказаў Лукашэнка.
«Мы аналізавалі гэтую сітуацыю з гэтых пазіцый і прыйшлі да такой высновы. Таму трэба рабіць зніжку на тое, што ўсё-такі імі кіравалі. А паколькі гэта маладыя ў асноўным людзі, ды і кіраўніцтва ПВТ спусціўшы рукавы там працавала — не ведалі сваіх людзей і не процідзейнічалі своечасова ўсім гэтым негатыўным тэндэнцыям — мы атрымалі тое, што атрымалі», — дадаў ён.
Лукашэнка таксама пацікавіўся, як працуе назіральная рада ў Парку высокіх тэхналогій і як кантралюецца сітуацыя ў ПВТ.
«Вы ж разумееце, што я як чалавек, які адказвае за бяспеку нашай дзяржавы і стабільнасць функцыянавання нашага грамадства, не магу дапусціць, каб у нас яшчэ раз пайшла хваля ад айцішнікаў, іпэшнікаў і гэтак далей. Яшчэ раз хачу падкрэсліць, я гэта не хаваю, што дзякуючы прэзідэнту з’явіліся такія галіны ў нашай эканоміцы і ў нашым грамадстве. Таму я за гэта нясу адказнасць, — заявіў ён.