Кампанія Yukon Advanced Optics Worldwide (брэнд Pulsar) адрэагавала на публікацыю «Люстэрка» пра тое, што зброевыя прыцэлы яе вытворчасці прадаюцца ў Расіі, трапілі ў рукі да байцоў аднаго з расійскіх падраздзяленняў, якія ваююць ва Украіне, і, відавочна, будуць выкарыстаныя ў баях. У літоўскай кампаніі адзначылі, што хочуць забяспечыць празрыстасць пытання, папярэдзіць няслушныя тлумачэнні і падкрэсліць сваю прынцыповую пазіцыю па падтрымцы Украіны. Публікуем каментар, які быў агучаны «Люстэрку».
«Кампанія Yukon Advanced Optics Worldwide цвёрда прытрымліваецца пазіцыі, якая была публічна агучаная 28 лютага 2022 года, пра аказанне ўсебаковай дапамогі Украіне і асуджэнне ваеннай агрэсіі Расійскай Федэрацыі супраць Украіны. Кампанія строга выконвае патрабаванні наконт недапушчальнасці пастаўкі сваёй прадукцыі ў тыя краіны, якія ўключаныя ў санкцыйныя спісы згодна з мясцовым і/або міжнародным заканадаўствам (дырэктывы ЕС).
24 лютага 2022 года кампаніяй прынятае рашэнне пра адмену ўсіх продажаў і паставак вырабленай прадукцыі ў Расійскую Федэрацыю, Рэспубліку Беларусь і краіны Цэнтральнай Азіі. З гэтага часу ніякая прадукцыя кампаніі не прадаецца прадпрыемствамі кампаніі на тэрыторыі РФ і РБ. Прадукцыя, вырабленая на заводах кампаніі ў Еўропе, ніколі не пастаўлялася ў РФ і РБ. Намі таксама было прынятае рашэнне пра спыненне дзейнасці прадпрыемства на тэрыторыі РФ.
На розныя ініцыятывы дапамогі Украіне і ўкраінскім уцекачам летась намі было вылучана каля 2 млн еўра.
1 лютага 2023 года на партале „Люстэрка“ была апублікаваная інфармацыя пра траплянне вырабленай кампаніяй прадукцыі ў зону ваеннага канфлікту. Кампанія ўважліва аналізуе наяўную інфармацыю. Паводле папярэдніх звестак у фотаздымках, названы прыбор быў выраблены ў Рэспубліцы Беларусь у перыяд 2019−2020 гг. Вытворчасць гэтага тыпу прыбораў была спыненая ў 2021 годзе. Прыборы кампаніі, як і дадзены прыбор, ніколі не вырабляліся для ваенных мэтаў і не адпавядаюць стандартам ваеннай прамысловасці.
Кампанія будзе ўдзячная за любую інфармацыю пра незаконнае траплянне вырабленай ёю прадукцыі ў зону ваеннага канфлікту ў выпадку выяўлення такіх фактаў».
Нагадаем, 1 лютага кіраўнік Паўночнай Асеціі наведаў у зоне баявых дзеянняў ва Украіне байцоў 19-й мотастралковай дывізіі, якая базуецца ва Уладзікаўказе, і перадаў ім тэхнічную дапамогу, у тым ліку 50 цеплавізараў і 20 прыбораў начнога бачання. Сярод іх былі і суперсучасныя начныя лічбавыя прыцэлы брэнда Pulsar, якія выпускае літоўская кампанія Yukon Advanced Optics Worldwide. Выявілася, што іх цалкам свабодна можна купіць у расійскіх крамах як прыцэлы для начнога палявання.