У Беларусі «самым сур’ёзным чынам» асцерагаюцца «агрэсіўных дзеянняў польскага кіраўніцтва». Пра гэта заявіў прэс-сакратар знешнепалітычнага ведамства Анатоль Глаз, адказваючы на пытанне РІА «Новости».
Супрацоўнікі расійскага інфармагенцтва папрасілі афіцыйнага прадстаўніка беларускага замежнапалітычнага ведамства пракаментаваць заяву кіраўніка польскага ўрада Матэвуша Маравецкага, які сказаў, што амерыканскі бок паабяцаў размясціць на польскай тэрыторыі некалькі тысяч салдат у дадатак да тых, якія ўжо знаходзяцца ў краіне.
На гэта Анатоль Глаз адказаў, што Беларусь «публічна і на ўсіх узроўнях» гаворыць пра тое, што самым сур’ёзным чынам асцерагаецца «агрэсіўных дзеянняў польскага кіраўніцтва».
— Фінансуюць экстрэмістаў, рыхтуюць нейкія баявыя дружыны супраць беларускага насельніцтва, праводзяць актыўную мілітарызацыю. Гэта ж відавочныя і ўсім вядомыя факты. Пры гэтым дзеянні цяперашняга ўрада часам фанатычныя, не вылучаюцца логікай і рацыянальнасцю, а таму не заўсёды прадказальныя, — сказаў Глаз.
Як прыклад «нерацыянальных дзеянняў» Польшчы ён прывёў закрыццё пунктаў пропуску на мяжы з Беларуссю.
— Скажу больш. Нядаўна Савет міністраў Польшчы прыняў пастанову пра невыкананне ў дачыненні да нашай краіны палажэнняў Дамовы пра звычайныя ўзброеных сілы ў Еўропе (ДЗУСЕ). Відавочнае жаданне яшчэ больш схаваць ад свайго найбліжэйшага суседа інфармацыю пра свае ўзброеныя сілы, — папракнуў Глаз.
Ён нагадаў, што дакумент ацэнены Генасамблеяй ААН як «кутні камень еўрапейскай бяспекі».
— Польскі ўрад цалкам свядома разбурае апошнія юрыдычныя апоры еўрапейскай сістэмы бяспекі. Мініруе ўсю Еўропу, — дадаў афіцыйны прадстаўнік МЗС.
Спікер падкрэсліў, што Беларусь і большасць краін Еўропы «не зацікаўленыя ў эскалацыі».
— Было вельмі шмат шуму і крытыкі, калі Расія з цалкам лагічных прычын прыпыніла дзеянне ДЗУСЕ. Вось зараз паглядзім, наколькі шумна адрэагуюць еўрапейскія сталіцы на адназначна дэструктыўны крок польскага ўрада. Адпаведную інфармацыю мы да іх давядзём. Будзе таксама цікава выслухаць пункт гледжання NATO наконт таго, як такая пазіцыя суадносіцца з пастаянна дэклараванай Альянсам прыхільнасцю да кантролю над узбраеннямі і транспарэнтнасці ў вайсковай сферы. Відавочна, што Польшчы неабходна перагледзець сваё рашэнне і вярнуцца да паўнавартаснага і добрасумленнага выканання ДЗУСЕ. Мы ж заўсёды гатовыя да канструктыўнага і ўзаемапаважлівага дыялогу, — сказаў Глаз.
Чытайце таксама
