Беларускія дэмакратычныя сілы і прадстаўнікі дыяспары ў розных краінах плануюць структурыраваць і «фармалізаваць» адносіны з міжнароднымі структурамі дзеля прыцягнення да адказнасці вінаватых у рэпрэсіях, «ціску на рэжым» і падрыхтоўцы дзеля транзіту ўлады. Аб гэтым расказала лідар дэмсілаў Беларусі Святлана Ціханоўская падчас «Канферэнцыя беларусаў свету II», якая праходзіць 22−23 красавіка ў Вільнюсе.
На беларусах, якія жывуць за мяжой, ляжыць вялікая адказнасць, бо яны выступаюць «голасам дзевяці мільёнаў беларусаў», «якія знаходзяцца ў пастаянным страху за сваё жыццё, бо ў краіне кожны дзень праходзяць масавыя затрыманні. Беларусаў, якія не ведаюць, што будзе заўтра, ці праз тыдзень, бо з цяперашнім станам беларускай эканомікі людзі не жывуць, а выжываюць. Беларусаў, якія супраць вайны, супраць ядзернай зброі і супраць дыктатара Лукашэнкі», заявіла лідар дэмсілаў Беларусі.
Каб структурыраваць супрацу з міжнароднымі структурамі, дэмсілы плануюць праз Кааліцыю, якая будзе выпрацоўваць канкрэтныя механізмы і сумесныя крокі на міжнароднай арэне ў дапамоге дэмакратычнаму руху, прыцягненні вінаватых у рэпрэсіях супраць беларусаў да адказнасці, ціску і ізаляцыі рэжыму, падрыхтоўцы да транзіту ўлады ў Беларусі. Гэтая праца ідзе ўжо зараз, але, па словах палітыка, ёсць намер яе «скіраваць на канкрэтныя вынікі».
— Мы — народ краіны, якая нам не належыць. Мы змагаліся за тое, каб беларусаў і рэжым падзялялі, і ў нас ёсць поспехі, якія трэба адстойваць кожны дзень — як у нядаўняй сітуацыі з галасаваннем у літоўскім Сейме, — заявіла Ціханоўская.
Адным з кірункаў палітык назвала запуск увосень стратэгічнага дыялогу з ЗША.
— Мы павінны фармалізаваць адносіны з Еўрапарламентам і Еўрапейскай радай па сацыяльных і эканамічных пытаннях, як гэта ўжо зрабілі ў Савеце Еўропы, дзе мы стварылі кантактную групу, — сказала Ціханоўская. — Неабходна падрыхтаваць дарожныя карты для развіцця і дапамогі беларускай грамадзянскай супольнасці.
Адным з кірункаў стане структурная праца па прыцягненню да адказнасці тых, хто мае дачыненне да рэпрэсій.
— Мы пакуль далёкія ад пачатку трыбуналу па Беларусі для Лукашэнкі і прадстаўнікоў ягонага рэжыму. Але рыхтуем да гэтага глебу ўжо сёння. Бо сілавікі, суддзі, пракуроры, чыноўнікі пры ўладзе павінны адчуваць, што ў іх дзеянняў будуць наступствы. Што кожны прысуд на гады нявінным людзям — гэта злачынства, за якое ў будучыні давядзецца адказаць, — працягнула Святлана Ціханоўская. — Рэпрэсіі працягваюцца. У турмах усё яшчэ тысячы нашых блізкіх і сяброў. Людзей працягваюць арыштоўваць і судзіць, а рэжым усё яшчэ адчувае сябе беспакараным. Ва ўмовах адсутнасці ў Беларусі незалежнай судовай улады вельмі важна запускаць міжнародныя механізмы па прыцягненні рэжыму да адказнасці. Зрушыць з месца справы па ўніверсальнай юрысдыкцыі. Падтрымаць ініцыятыву Літвы па прыцягненні рэжыму да адказнасці ў міжнародным судзе ААН за арганізацыю міграцыйнага крызісу. Мы чакаем даклад у межах Маскоўскага механізма АБСЕ, ён можа адчыніць новыя дзверы, у тым ліку для пачатку працэсу ў межах Міжнароднага крымінальнага суда.