Які досвед Узброеныя сілы Беларусі ўзялі з вайны ва Украіне, расказаў камандуючы сіламі спецаперацый Вадзім Дзенісенка ў сваім выступе 2 жніўня, прымеркаваным да Дня дэсантнікаў і ССА. Стэнаграму яго прамовы апублікавала прэс-служба Мінабароны.
Дзенісенка адзначыў, што «з канфлікту, які ідзе на поўдні», беларускія вайскоўцы чэрпаюць «шмат інфармацыі» і многія моманты «мяняюцца карэнным чынам».
— Цяпер мы пераглядаем, уносім у праграму баявой падрыхтоўкі зусім новыя элементы, пра якія раней мы не думалі. Яны былі, тады здавалася, непатрэбнымі. Цяпер гэта, аказваецца, вельмі патрэбна. Калі вы звярнулі ўвагу, усё вяртаецца да той старой вайны: выкарыстанне артылерыі, прычым у вялікай колькасці, дзеянне дробных падраздзяленняў. Вось гэта мы цяпер уводзім, — сказаў камандуючы ССА.
Ён падкрэсліў, што ў сілах спецыяльных аперацый першапачаткова падчас стварэння была пабудаваная сістэма дзеяння дробнымі падраздзяленнямі: узвод, рота.
— Батальён — гэта ўжо лічылася буйным. Цяпер мы дзелім ніжэй: дзеянне асобнага аддзялення на асобным напрамку, выкананне пэўных задач. Мы атрымалі новыя БТР 82А. Мы адразу атрымалі новы батальённы камплект. На ім цяпер усё адпрацоўваецца. Гэта пачатак пераўзбраення, — заўважыў Дзенісенка.
Спікер паведаміў, што ў наступным навучальным годзе падрыхтоўка вайскоўцаў ССА будзе ісці па двух асобных напрамках: падрыхтоўка дэсантных падраздзяленняў і падрыхтоўка спецназа.
— То-бок два складнікі сіл спецыяльных аперацый, і кожная ідзе сваім шляхам, — сказаў Дзенісенка.