У Беларусі за апошнія месяцы ўвялі некалькі падатковых зменаў. Адна з іх, да прыкладу, датычыць падатку на прафдаход, яшчэ адна — звестак, якія наймальнікі перадаюць падатковай пра даходы сваіх работнікаў. «Люстэрка» расказвае пра новаўвядзенні.
Што змянілі па падатку на прафдаход
З 8 чэрвеня ўвялі падатковыя змены для тых, хто працуе на падатку на прафесійны даход. Так, для іх прапісалі штраф у 30 базавых велічыняў (на сёння гэта 1110 рублёў) за тыя выпадкі, калі ў спецыяльнай праграме не будзе сфармаваны чэк за здзейсненыя работы і паслугі.
Тым часам тым, хто здае на суткі жыллё і працуе на падатку на прафдаход, увялі абавязак прапісваць у чэку інфармацыю пра адрас і тып такой нерухомасці.
Нагадаем, падатак на прафдаход увялі сёлета. На гэты збор могуць перайсці самазанятыя, якія не зарэгістраваныя індывідуальнымі прадпрымальнікамі. То-бок гаворка пра фізічных асобаў, у якіх ёсць прафесійны даход ад дзейнасці. Пры гэтым у іх няма працадаўцы і яны не прыцягваюць іншых работнікаў па працоўных або грамадзянска-прававых дамовах. Пры гэтым некаторыя ІП таксама могуць перайсці на працу на гэтым падатку. Для тых, хто працуе з фізічнымі асобамі, падатак складае 10%.
Што адкарэктавалі па даходах фізічных асобаў, пра якія наймальнікі паведамляюць падаткавікам
Чыноўнікі таксама ўпарадкавалі справаздачнасць падатковых агентаў, то-бок працадаўцаў — арганізацый і ІП — пра пэўныя даходы іх супрацоўнікаў.
Сярод іншага цяпер наймальнікам не трэба даваць справаздачу пра даходы работнікаў ад прададзенай прадукцыі раслінаводства. Да прыкладу, за 2022 год трэба было падаваць такія звесткі, калі грашовыя паступленні з такой крыніцы перавышалі 2965 рублёў за дзень.
Цяперашнія праўкі ўвялі праз тое, што з гэтага года адрэдагавалі Падатковы кодэкс, а цяпер прыводзяць астатнія дакументы ў адпаведнасць з гэтымі зменамі.
Якое новаўвядзенне па зямельных участках
З 1 студзеня 2024 года ўвядуць новую форму звестак пра выкарыстанне фізічнымі асобамі зямельных участкаў, па якіх не праведзеная або не патрабуецца (не патрабавалася) дзяржрэгістрацыя правоў.
Паглядзець абноўленую форму можна па гэтай спасылцы на 8-й старонцы пастановы Міністэрства па падатках і зборах.
Чытайце таксама
