Дэпутаты парламента ў сераду, 22 лістапада, прынялі ў першым чытанні законапраект, якім хочуць увесці змены ў крэдытных гісторыях беларусаў. Чыноўнікі хочуць, каб у гэтыя гісторыі ўключалі звесткі пра ўзятыя ў растэрміноўку тавары.
Нагадаем, у 2015 годзе Нацбанк запусціў крэдытны рэйтынг насельніцтва — гэта адзнакі тым, хто хоча ўзяць пазыку. У крэдытную гісторыю чалавека ўключаюць сярод іншага інфармацыю пра крэдыты, дамовы пазыкі, лізінг. Прымаючы рашэнне наконт выдачы пазыкі, банкі арыентуюцца сярод іншага і на гэты рэйтынг.
Цяпер чыноўнікі хочуць уключаць у крэдытную гісторыю інфармацыю пра адтэрміноўкі ці растэрміноўкі па аплаце тавараў і паслуг у гандлёвых сетках, у мабільных аператараў. «Да арганізацый, якія прадстаўляюць спажыўцам тавары і паслугі на ўмовах адтэрміноўкі ці растэрміноўкі плацяжу, можна аднесці такія буйныя арганізацыі, як СТАА „Мабільныя ТэлеСістемы“, унітарнае прадпрыемства „A1“, ТАА „ПАЛОМА СЭРВІС“ (сетка салонаў „НА'СВЯЗИ“) і іншыя», — удакладняюць у парламенце.
Раней Нацбанк размяшчаў законапраект з такімі прапановамі для грамадскага абмеркавання. Тады рэгулятар тлумачыў, што гэтае патрабаванне, калі яго ўвядуць, закране ў тым ліку такі буйны анлайн-гіпермаркет, як 21vek.by.
У парламенце лічаць, што гэтае новаўвядзенне «дазволіць крэдыторам дакладней ацэньваць даўгавую нагрузку і крэдытаздольнасць фізічных асоб». «Такая практыка з’яўляецца распаўсюджанай: падобнае прававое рэгуляванне ёсць у заканадаўстве, якое рэгулюе крэдытныя гісторыі ў Расійскай Федэрацыі, Рэспубліцы Казахстан, іншых краінах», — удакладняюць ў парламенце.
Нагадаем, таксама чыноўнікі хочуць увесці гэтым законапраектам магчымасць даваць крэдытную справаздачу ў выпадку смерці фізасобы яе спадчынніку. Яшчэ ўлады збіраюцца канкрэтызаваць механізм адклікання згоды суб’екта крэдытнай гісторыі на прадстаўленне Нацбанкам карыстальніку крэдытнай гісторыі яго крэдытнай справаздачы.
Далей законапраект мусіць у другім чытанні разгледзець парламент, пасля чаго ён адправіцца ў Савет Рэспублікі, а затым (калі яго ўхваляць) — на стол Аляксандра Лукашэнкі.
Чытайце таксама
