Нацбанк абнавіў інструкцыю пра парадак правядзення валютна-абменных аперацый. «Люстэрка» паглядзела, што змяніў рэгулятар.
Банкам дазволілі не прымаць для абмену некаторую валюту
Так, Нацбанк прапісаў, што касір можа не браць у кліентаў — фізічных асобаў наяўную валюту, «попыт на якую нязначны і афіцыйны курс беларускага рубля адносна якой вызначае Нацбанк штомесяц».
Рэгулятар кожны месяц вызначае курс, да прыкладу, азербайджанскага маната, алжырскага і іракскага дынара, ганконскага даляра, егіпецкага фунта, лары і іншых.
Як і цяпер, работнік абменніка не зможа адмовіць у продажы наяўнай замежнай валюты, якая ёсць у касе. Выключэнне — калі яна прызначаная для выдачы кліентамі-іфізічным асобам з іх рахункаў, а таксама выдачы юрыдычным асобам на выдаткі ў камандзіроўках. Таксама могуць адмовіць у абмене той валюты, прызначанай для выдачы рэшты і правядзення канверсіі.
Новаўвядзенне што да курсу на электронным табло
Таксама Нацбанк прапісаў, што інфармацыя пра абменныя курсы можа прысутнічаць на спецыяльным электронным табло. «Не дапускаецца паказванне рознай інфармацыі пра вызначаныя абменныя курсы на спецыяльным электронным табло і на інфармацыйным стэндзе альбо іншым носьбіце інфармацыі ля абменных пунктаў, касаў», — адзначае рэгулятар.
Курсы ў мабільных праграмах
Нацбанк таксама прапісаў, як банкі могуць абменьваць валюту праз мабільныя праграмы. Так, яны павінныя папярэджваць кліентаў, якім будзе курс.
Таксама рэгулятар адзначыў, што кліенты могуць патрабаваць скасавання валютна-абменнай аперацыі, калі падчас яе адбыўся тэхнічны збой у працы аплатна-разліковага тэрмінала.
Калі запрацуюць новаўвядзенні?
Змяненні ўвядуць праз тры месяцы — у канцы кастрычніка.
«Новая рэдакцыя інструкцыі таксама ўтрымлівае шэраг дапаўненняў, якія ўдакладняюць асобныя нормы што да правядзення валютна-абменных аперацый, што дазволіць выключыць неадназначнасць іх тлумачэння», — удакладняе Нацбанк.
Чытайце таксама
