Беларускія ўлады вызвалілі ААТ «Газпрам трансгаз Беларусь» ад выплаты пені за невыкананне тэрмінаў будаўніцтва «Газпрам Цэнтра» на скрыжаванні праспекта Незалежнасці і вуліцы Філімонава. Цяпер тут плануюць будаваць бізнес-апартаменты.
На ўказ Лукашэнкі № 152 ад 1 чэрвеня 2023 года звярнуў увагу Reform.by. Таксама дакумент, які ўступіў у сілу з дня падпісання, прадугледжвае вызваленне ад арэнднай платы за аддадзены пад будаўніцтва зямельны ўчастак з 2022-га да канца 2028 года. Указ дазваляе будаўніцтва ў «Газпрам Цэнтры» бізнес-апартаментаў, то-бок шматфункцыянальных памяшканняў, у якіх уласнікі і арандатары змогуць рэгістраваць сябе і свае сем'і.
Даўгабуд «Газпрам Цэнтра» з’явіўся на месцы знесенага аўтавакзала «Маскоўскі» ў 2015 годзе. Першапачаткова чакалася, што тут размесціцца самае высокае збудаванне Мінска — 189-метровы хмарачос. Ён мусіў стаць цэнтрам кампазіцыі з яшчэ васьмі іншых корпусаў, у якой размясціліся б офісныя памяшканні, гатэль, рэстаран, медцэнтр і спартыўныя збудаванні. Будаўніцтва коштам амаль мільярд даляраў мусіла завяршыцца ў 2018 годзе.
У снежні 2016 года будаўніцтва «Газпрам Цэнтра» замарозілі. У 2018 годзе ў праекта з’явіўся новы генпадрадчык — італьянская кампанія Codest International. Актыўныя работы на аб’екце вяліся ў 2020 годзе, але потым будоўлю зноў спынілі.
Чытайце таксама
