Урад Чэхіі ўвёў бестэрміновую забарону на выдачу віз грамадзянам Беларусі, уведзеную пасля пачатку вайны ва Украіне, дзеянне якой заканчвалася 31 сакавіка 2024 года. Пра гэта паведаміў журналістам прэм’ер-міністр Чэхіі Пётр Фіяла, перадае Denik.cz.
Фіяла адзначыў, што Чэхія з прычыны ўварвання ва Украіну і далей не будзе выдаваць віз і дазволаў на пражыванне грамадзянам Беларусі і Расіі.
Урад зрабіў бестэрміновым дзеянне забароны на прапанову МЗС Чэхіі.
Чэхія, паводле Фіялы, будзе, апроч іншага, ствараць умовы для ўезду і знаходжання ў краіне «прадстаўнікоў апазіцыі і студэнтаў, якія не хочуць мець нічога агульнага з рэжымамі Беларусі і Расіі».
Пасля пачатку вайны ва Украіне ўрад Чэхіі адмяніў выдачу віз беларусам, як і расіянам, акрамя як з гуманітарных меркаванняў. У чэрвені 2022 года Чэхія перастала выдаваць грамадзянам Беларусі і Расіі не толькі візы, але і віды на жыхарства, забарона была ўведзеная да канца сакавіка 2023 года. Пасля яе падоўжылі яшчэ на год.
Пры гэтым віза ці від на жыхарства могуць быць выдадзеныя таксама тым людзям, у якіх зацікаўлена Чэхія, але ў гэтым выпадку такую неабходнасць мусіць абгрунтаваць яе міністр замежных справаў. Акрамя таго, рашэнне не распаўсюджваецца на атрыманне ВНЖ, калі просьбіт — член сям'і замежніка, які мае від на жыхарства ў Чэхіі. Забарона не дзейнічае таксама на беларусаў, якія падаюць заяву на атрыманне ВНЖ з мэтай навучання ў ВНУ на аснове стыпендый, дадзеных Чэхіяй, Еўрасаюзам або міжнароднымі арганізацыямі.