У Гомелі абвясцілі прысуд работніку ААТ «Гомельскі завод пускавых рухавікоў» Івану Памесячнаму, які абвінавачваўся ў знішчэнні, блакаванні ці мадыфікацыі камп’ютарнай інфармацыі, што пацягнула цяжкія наступствы, паведамілі ў прэс-службе суда.
Паводле версіі абвінавачання, 16 лістапада 2022 года мужчына «з помсты за нібыта не выплачаны ў поўным аб’ёме заробак» выдаліў доступ да сістэмных файлаў, прывёўшы ў няспраўны стан праграмнае забяспечанне. Яго дзеянні заблакавалі «камп'ютарную сістэму» і пацягнулі «цяжкія наступствы ў выглядзе матэрыяльных выдаткаў, скіраваных на прыцягненне падраднай арганізацыі для выканання работ па распрацоўцы новых праграм, дакументацыі і работ, у суме 99 000 рублёў».
Суд прызнаў Івана Памесячнага вінаватым па ч. 3 арт. 350 КК. Яму прызначылі тры гады пазбаўлення волі ў калоніі ўзмоцненага рэжыму. Акрамя таго, гамяльчаніна абавязалі выплаціць прадпрыемству 98 500 рублёў у кошт кампенсацыі шкоды.
Прысуд у законную сілу не ўступіў і можа быць абскарджаны.
Нагадаем, за год да інцыдэнту Іван Памесячны быў адным з герояў публікацыі газеты «Савецкі раён». Паведамлялася, што ён вучыўся ў Гомельскім аўтамеханічным каледжы, затым скончыў факультэт машынабудавання Мазырскага педуніверсітэта, змяніў некалькі месцаў працы.
Акрамя працы наладчыкам на заводзе Іван Памесячны зарабляў на жыццё фотаздымкай вяселляў. Таксама спрабаваў сябе ў мантажы кліпаў і напісанні песень.