Санэпідслужба Міністэрства аховы здароўя Беларусі апублікавала вынікі свайго расследавання выпадкаў захворвання на кішачныя інфекцыі сярод наведнікаў кавярні ў Брэсце. Пра гэта паведамляе тэлеграм-канал міністэрства.
Паводле эпідэміёлагаў, прычынай атручання сталі парушэнні, якія дапусцілі ўладальнікі і работнікі кавярні. Гэта, у прыватнасці, няправільнае прыгатаванне страваў і тое, што некаторыя работнікі былі носьбітамі інфекцыі, але не прытрымліваліся правілаў гігіены.
«Прычынамі гэтай сітуацыі стала невыкананне правілаў тэрмічнай апрацоўкі страваў, якія гатаваліся з сырых эпідэміялагічна значных прадуктаў, і невыкананне правілаў асабістай гігіены работнікамі кавярні, сярод якіх выяўленыя носьбіты інфекцыі», — гаворыцца ў паведамленні.
Праца кавярні прыпыненая. У дачыненні да службовых асоб пачалі адміністрацыйныя працэсы. Матэрыялы расследавання перададуць у пракуратуру.
У сувязі з атручаннем кліентаў у брэсцкай кавярні Мінздароўя таксама выпусціла рэкамендацыі для ўладальнікаў такіх установаў. Ім параілі звяртаць увагу на стан здароўя супрацоўнікаў і няўхільна выконваць умовы захоўвання прадуктаў і прыгатавання ежы, а таксама правяраць тэрміны прыдатнасці і тое, ці дастаткова прапечаныя ці звараныя стравы.
Нагадаем, што ў Брэсце ў адной з кавярняў прапаноўвалі сэт з чатырох страваў, пасля чаго наведнікаў пачалі масава шпіталізаваць. Афіцыйна зарэгістравалі 19 выпадкаў атручання. У іх дыягнаставалі гастраэнтэрыт. 12 чалавек трапілі ў бальніцу, сямёра лячыліся ў амбулаторных умовах.
Пазней высветлілася, што ўсё адбылося ў кавярні Le’Mar, якая з 18 красавіка да 5 траўня брала ўдзел у кулінарным фестывалі Gastrofest-2024. Адкрытая вясной мінулага года ўстанова, дзе спецыялізуюцца на «аўтарскай кухні з еўрапейска-азіяцкім ухілам», прапанавала на фестываль сэт з чатырох страваў агульным коштам 38 рублёў. Гэта былі тартар з філе дарада з фірмовай запраўкай, крэмам-чыз, вэнджанай чорнай брыошшу і ікрой масага, брыскет з ялавічыны ў глазуры, з пастай орза, марынаванай прыпраўленай спаржай і клубнічным кулі, індык у вугальным рамэне з падліўкай дэміглас і эспумай з чорнага труфеля, мус з белага шакаладу і белых грыбоў з гелем з пеністага віна, храбусткім крамблам, малінай і шматкамі міндаля.