У Беларусь у панядзелак, 29 ліпеня, можа прыйсці сур’ёзны цыклон. Яго праявы будуць заўважныя ўжо ў нядзелю, паведамілі ў Белгідрамеце. На суботу абвешчаны жоўты ўзровень небяспекі.
У пятніцу, 26 ліпеня, надвор’е ў Беларусі па-ранейшаму вызначае цёплая няўстойлівая паветраная маса, на захадзе захаваецца ўплыў атмасфернага фронту. Пераменная воблачнасць. Ноччу пераважна ў заходняй палове, днём месцамі, а на захадзе на большай частцы тэрыторыі пройдуць дажджы. У асобных раёнах чакаюцца навальніцы, ноччу месцамі на захадзе краіны — моцныя дажджы. У начныя і ранішнія гадзіны ў асобных раёнах слабы туман. Вецер няўстойлівы слабы да ўмеранага, падчас навальніцаў — парывісты.
Тэмпература паветра ўначы +12…+18°С, удзень +25…+30°С, у заходніх раёнах Беларусі +21… +24°С. Атмасферны ціск будзе расці.
У суботу, 27 ліпеня, чакаецца пераменная воблачнасць. Месцамі па краіне — кароткачасовыя дажджы і навальніцы. Ноччу і раніцай у асобных раёнах слабы туман. Вецер няўстойлівы ад слабога да ўмеранага, падчас навальніцаў — парывісты.
Тэмпература паветра ўначы +11… +17°С, удзень +24…+30°С. Абвешчаны жоўты ўзровень небяспекі праз навальніцы і туман.
А ў нядзелю, 28 ліпеня, ноччу надвор’е будзе вызначаць вобласць павышанага атмасфернага ціску, днём адаб’ецца ўплыў атмасферных франтоў ад цыклону з цэнтрам над Балтыйскім морам. Ноччу пераменная воблачнасць, днём воблачна з праясненнямі. Ноччу пераважна без ападкаў, днём на большай частцы тэрыторыі краіны пройдуць кароткачасовыя дажджы, месцамі прагрымяць навальніцы. Ноччу і раніцай у асобных раёнах слабы туман. Вецер паўднёвы, удзень з пераходам на заходні ўмераны, удзень парывісты, месцамі моцны парывісты.
Тэмпература паветра ўначы +12…+19°C, максімальная днём складзе ад +22°C на захадзе да +32°C на паўднёвым усходзе краіны.
Што да згаданага цыклону, то да панядзелка, 29 ліпеня, Беларусь могуць чакаць узмацнення ветру парывамі 20−23 м/с, а ў краінах Балтыі — да 25 м/с. Як адзначыў аўтар тэлеграм-канала Nadvorie, «будзем мець дачыненне з выбухным цыклагенезам, т. зв. бомбавым развіццём пазатрапічнага цыклону».