Полк Каліноўскага паведаміў пра вызваленне вёскі Кляшчэеўка ў Бахмуцкім раёне Данецкай вобласці і паказаў відэа, на якім відаць, як байцы ідуць па населеным пункце.
«На відэа кадры, знятыя медыкамі палка Каліноўскага, якія заходзяць у вызваленую ад рускіх акупантаў Кляшчэеўку (прыгарад Бахмута). Вёска вызвалена ў тым ліку намаганнямі ваяроў батальёна „Волат“ і батальёна „Літвін“ палка Каліноўскага, а таксама палкавога БПЛА ім. Мікіты Крыўцова!» — гаворыцца ў паведамленні.
У сваю чаргу Мінабароны Расіі ў сваёй штодзённай зводцы заявіла, што за суткі расійскія войскі адбілі чатыры атакі штурмавых груп УСУ ў раёнах населеных пунктаў Кляшчэеўка і Маёрск.
Вёска была захопленая расійскімі войскамі ў студзені 2023 года. Тады «ваенны эксперт» з самаабвешчанай ЛНР Віталь Кісялёў заяўляў, што «ўсталяванне расійскімі сіламі кантролю над Кляшчэеўкай, размешчанай на поўдзень ад Бахмута, мае стратэгічна важнае значэнне для развіцця наступу на гэты горад».
Нагадаем, раніцай 15 верасня Генштаб УСУ заявіў, што ўкраінскія падраздзяленні ўвайшлі ў пасёлак Андрэеўка Данецкай вобласці. А байцы, што там ваююць, расказалі, як вызвалялі населены пункт.
