У Дубаі (ААЭ) наймацнейшая паводка пасля залевы. Паводле звестак сіноптыкаў, за 12 гадзін у горадзе выпала прыкладна столькі ападкаў, колькі звычайна фіксуюць тут за год. Мінчук Андрэй, які ў Аб’яднаных Арабскіх Эміратах ужо паўтара года, такога дажджу тут не бачыў яшчэ ні разу. Беларус жыве на першым паверсе гасцявога дома і кажа, што ўдзень на падлозе ў яго стаяла вада.
З меркаванняў бяспекі імя суразмоўцы змененае.
Андрэю 28 гадоў, ён працуе з дому. Кажа, у дзевяць-дзесяць раніцы, калі прачнуўся, дождж ужо ішоў. Пра набліжэнне стыхіі мясцовыя сіноптыкі папярэджвалі загадзя.
— Арабскія навіны пісалі, што насоўваецца шторм, але таго, што ён будзе такі здаровы, ніхто не чакаў! — не хавае эмоцый суразмоўца. — Цяпер паводле мясцовага часу каля дзевяці вечара (20.00 паводле Мінска. — Заўв. рэд.), кажуць, у дзесяць будзе самая буйная хваля шторму. Я вырашыў здзейсніць гераічны ўчынак і выйсці ў краму ля дома, каб, калі што, не памерці з голаду. Выглядае ўсё вакол нібы Ноеў каўчэг!
Паводле суразмоўцы, залева ідзе перыядамі. Спачатку залівала некалькі гадзін раніцай, потым надвор’е супакоілася, усё падсохла. Потым стыхія пайшла на другі і трэці заход.
— Прэвентыўных мераў не было, але з раніцы многім, хто працуе афлайн, сказалі сядзець дома. Адмянілі заняткі ў школах і ўніверсітэтах, нельга скарыстацца службай дастаўкі, таксі, — пералічвае Андрэй. — Я жыву ў цэнтры горада, кавярні, якія знаходзяцца ў мяне на раёне, закрытыя, як і маленькія крамкі.
Так выглядае вуліца каля дома Андрэя:
Малады чалавек арандуе аднапавярховы дом. Памяшканне знаходзіцца «сантыметраў на дзесяць» вышэй за ўзровень зямлі. У нейкі момант вада пачала зацякаць усярэдзіну і паднялася «дзесьці на сантыметр». Давялося слаць ручнікі ля вокнаў і дзвярэй. На думку Андрэя, яму яшчэ пашанцавала.
— Цікава, што рабілася ў суседзяў, якія жывуць у нізіне? — задаецца ён пытаннем і прызнаецца, што вада — не тое, што яго сёння асабліва ўразіла. — Гадзін у сем вечара пачало зіхацець, як дыскатэка. Я запісваў сябру кружок у Telegram. Было адчуванне, хтосьці стаіць і фарамі міргае. Падымаю вочы на неба, а гэта маланкі. Цяпер ужо гадзіны дзве не лье, таму ў доме ў мяне суха, і дзякуй богу!
Як кажа суразмоўца, галоўную вуліцу Дубая, Шэйх-Заед-Роўд, мясцовыя ў аўторак назвалі «рака шэйха Заеда».
— Яна тут як праспект Незалежнасці ў Мінску, толькі па восем палос у кожны бок. Праз ваду там сёння можна было праехаць толькі па адной, — апісвае сітуацыю беларус. — Сябар сто метраў ехаў 25 хвілін. Дабірацца яму трэба было праз увесь горад, таму ў заторы ён агулам стаяў чатыры гадзіны.
Андрэй расказвае, што ў мясцовых СМІ пішуць, што ў сераду залева спыніцца.
— Але заўтрашні дзень, кажуць, мы яшчэ сустрэнем з ёю, таму, магчыма, усе зноў застануцца дома, — заўважае малады чалавек. — У чацвер у Дубай на адпачынак збіраюцца прыляцець мае сябры. Нічога адмяняць праз надвор’е яны не будуць. Наадварот, гэта цікава.
«Люстэрка» расказвае пра сітуацыю ў свеце — хутка і аб’ектыўна. Мы знаходзім відавочцаў і ўдзельнікаў самых важных здарэнняў, каб атрымліваць інфармацыю з першых рук.
Падтрымайце рэдакцыю 🙌
Станьце патронам «Люстэрка» — журналісцкага праекта, якому вы дапамагаеце заставацца незалежным. Ахвяраваць любую суму можна хутка і бяспечна праз сэрвіс Donorbox.
Усё пра бяспеку і адказы на іншыя пытанні вы можаце даведацца па спасылцы.
