У 2024 годзе грамадзяне РФ аддалі амаль 250 мільярдаў расійскіх рублёў (блізу 2,8 мільярда даляраў). 40% гэтай сумы, то-бок больш за мільярд даляраў, пайшло на фінансаванне УСУ, заявіў у эфіры тэлеканала «Россия-24» старшыня праўлення «Сбербанка» РФ Станіслаў Кузняцоў.
Паводле Кузняцова, не выключана, што па выніках 2024 года сума, аддадзеная расіянамі ашуканцам, дасягне 300 мільярдаў расійскіх рублёў (каля 3,3 млрд даляраў).
Найбольшая частка атрыманых ашуканцамі грошай, не менш за 40%, ідзе на фінансаванне УСУ, дадаў ён. Кузняцоў лічыць, што кіберпісьменнасць расіянам неабходная ў тым ліку для таго, каб «не дазваляць фінансаваць Узброеныя сілы Украіны».
Паводле кіраўніка «Сбербанка» РФ, з пачатку гэтага года грамадзяне Расіі аддалі ашуканцам амаль 250 мільярдаў расійскіх рублёў (блізу 2,8 мільярда даляраў). Такім чынам, 40% гэтай сумы, якія яны неспадзявана «заданацілі» УСУ, складае больш за 1,1 мільярда даляраў.
У асноўным тэлефануюць праз мэсэнджары, а 40−50% — з дапамогай традыцыйнай сотавай сувязі. Кузняцоў расказаў, што амаль тры чвэрці ашуканцаў падчас тэлефонных званкоў выкарыстоўваюць адну з пяці тэмаў: «Альбо гэта МУС, ФСБ, Цэнтральны банк, альбо гэта бяспечны рахунак, альбо пятае — гэта паведаміце код з СМС, тады мы ўратуем вашыя грошы».
Раней у верасні ў 13 рэгіёнах Расіі ліквідавалі сетку нелегальных вузлоў сувязі, з іх дапамогай ашуканцы тэлефанавалі расіянам з-за мяжы. Паводле звестак МУС, у сваёй дзейнасці зламыснікі выкарыстоўвалі больш за восем тысяч тэлефонных нумароў.
Нагадаем, летась гаварылася, што «ўкраінскія кол-цэнтры» выбавілі ў беларусаў больш за пяць мільёнаў даляраў. Два гады таму паведамілі пра 4,5 мільёна.