У Баранавічах сілавікі правялі аблаву, затрымаўшы не менш за дзесяць чалавек. Пра гэта паведамілі праваабаронцы са спасылкай на актывіста Юрыя Казакевіча. 11 лістапада набліжаны да ГУБАЗіК тэлеграм-канал пацвердзіў інфармацыю пра «рэйд».
Паведамлялася, што «хапун» адбыўся 9 лістапада. Сярод затрыманых аказаўся праваабаронца Аляксандр Вайцешык. У яго дома прайшоў ператрус. Пазней Вайцешыка судзілі за распаўсюд «экстрэмісцкіх» матэрыялаў, піша тэлеграм-канал «Вясна Брэст».
11 лістапада набліжаны да ГУБАЗіК тэлеграм-канал расказаў, што ў Баранавічах прайшла «чарговая адпрацоўка рэгіёна», і апублікаваў «пакаяльныя» відэа шасці затрыманых з прыпіскай пра тое, што «працяг будзе».
«Крымінальная справа па масавых беспарадках у Баранавічах проста цяпер папаўняецца новымі тамамі. Затрымліваюць актыўных удзельнікаў, якія вярнуліся з-за мяжы. <…> А колькі яшчэ месцаў, дзе не дадзеная прававая ацэнка беспарадкам і перакрыццям дарог? Рэгіёнам падрыхтавацца», — прыгразіў прапагандысцкі рэсурс.